
Vesterveg
Slåttar over Nordsjøen
For over tusen år sidan reiste folk vestover frå Noreg, over Nordsjøen og mot dei britiske øyane. Med seg hadde dei språk, skikkar og musikk, og dei sette spor som framleis finst på begge sider av havet.
Namnet Vesterveg viser til desse reisene. I dag held reisa fram, men i ei anna form.
Vesterveg er ein norsk-britisk folkemusikktrio som utforskar det musikalske slektskapet mellom folkemusikktradisjonane i Noreg og Storbritannia. Sidan 2022 har Ingrid Sørheim, Lisa Haugeland og Bob Downham ført saman tradisjonelle slåttar, eigne arrangement og nykomponert musikk, framført på durspel, hardingfele, fele, fløyter og sekkepiper.
Musikken er rå, energisk og full av driv. Med kraftfullt spel, smittande groove og tett samspel møtest tradisjonane i eit musikalsk uttrykk som både kan vera vilt og leikent. Dette er folkemusikk som skal spelast høgt, delast med andre og dansast til.
Det som ein gong kryssa havet med skip, kryssar det no gjennom musikken. To tradisjonar, bundne saman av historia og førte vidare i vår tid.

